!! हार्दिक शुभेच्छा !!

इवलेसे आयुष्य त्यात चढ़ उतार फार

सुख लाभे थोड़े आणि दु:ख़े असती अपार

दिवस रात्रीच्या चक्रात जीवनाला वळणे ती किती ?

अभ्यासाचे दिवस थोड़े आणि त्यात परीक्षेची भीती!

चिन्तातुर मन होई कधी होई हवालदिल

अंधा-या रात्रीत आमच्या शुभेच्छाचे कंदील ...
मार्गातल्या या खाच खळग्यांसाठी कन्दिलाची सोबत

आता येऊ देत कीतीही अडचणीचे पर्वत!

कारण कन्दिलाच्या काचेत आहे “प्रकाश” तुमच्या सोबत !!!

-: वैशाली बताले .

*** यशस्वी भव ***

सर धोपट सरळ मार्ग कधीच कुठे असत नाही ...

वेडया वाकड्या वळणांशिवाय आयुष्यही कळत नाही ...

चिकाटी मेहनत प्रयत्न हाच यशाचा खरा प्राण

एका दिवसात पडत नसते पदरी यशाचे वाण!

उज्ज्वल यश पदरी पडेल होईल तुझा सन्मान

“प्रयत्नांति परमेश्वर” हेच तुला वरदान !

*** मन : पूर्वक शुभेच्छा ***

! ! ! परीक्षेच्या हार्दिक शुभेच्छा ! ! !
दर वर्षी येते परीक्षा वाटे तिची उगाच धास्ती
सरळ सोप्या आयुष्यातली जणू आफत नस्ती !
कटू - गोड अनुभव हेच जीवनाचे सार
परीक्षेपुढे मानू नको तू कधीही हार
मन तुझे खंबीर ठेव प्रयत्नाच्या वारुवर तू स्वार हो
आयुष्याच्या सगळ्याच परीक्षेत सदैव यशस्वी हो !

:- वैशाली बताले -:

!!! लग्नाच्या प्रथम वाढदिवसाच्या मधुर शुभेच्छा !!!

मधुर क्षणाच्या हळव्या मनांच्या हळव्या ओल्या आठवणी

सरले वर्ष तरलतेचे ते कळलेही नाही ...

नात्याचा गोडवा जपावा असाच तुम्ही

शुभेच्छाची पखरण करतो आज आम्ही ...

ताटव्यात फुलावेत क्षण प्रीतीचे नसावेत तेथे काटे कुणी

रथ दौडावा दिमाखात परि नसावे कुरकुरणारे चाक कुणी ...

सतार छेडता दो ह्रुदयानी तरंग उमटावे तनामनावर

असे परस्परांचे रेशमी नाते सुखे नांदावे या अवनीवर ...

वैशाली बत्ताले

*** जागतिक महिला दिनाच्या शुभेच्छा ***

स्त्री शक्तीच्या रुपात घडले दर्शन लोभसवाणे
मनी उमटले सुर गाती आनंदाचे गाणे...
झंकारू दे वीणा यशाची नभही व्हावे ठेन्गणे
कर्तृत्वाच्या प्रकाशात चमकावे यशाचे रूप देखणे...
वीणावादनात दन्ग होती देव दानव ऋषी मुनी
अढळपद हृदयात म्हणोनी तू सप्त सुरांची राणी ...
क्षण सौख्याचा करू आपण अत्यानंदे साजरा
आदी शक्तीच्या नवस्वरुपास आमुचा मानाचा मुजरा !!!
-वैशाली बत्ताले.

मी आणि तू

सजून धजून येई रुजून एक ओळ गाण्याची

पापणीत अजून भिजुन एक ओळ पाण्याची...

मी मिटून तू फुलून एक ओळ रुजण्याची

श्वासा मधून ये बहरून एक ओळ भुलण्याची ...

सहज उलून ओठी फुलून एक ओळ जगण्याची

हसत हसत झेलू मरण एक ओळ तरण्याची ...

मी अधीर तू मधुर एक ओळ खुलण्याची

सय येऊन मन बावरुन एक ओळ झुरण्याची ...

मन हरखून तन भिजुन एक ओळ कहाण्याची

तुला स्मरून मी हरवुन एक ओळ बहाण्याची ...

वैशाली बताले.